ಹಕ್ಕಿಯ ತೆರದಿ ಆಗಸ ಚುಂಬಿ
ಹಾರಾಡುವ ಬಯಕೆ
ಮೀನಿನ ಬೆಡಗಲಿ ನೀರಲಿ ಜಿಗಿದು
ಈಜಾಡುವ ಬಯಕೆ
ಕತ್ತಲ ಬಾನಿನ ಚಪ್ಪರದಡಿಯಲಿ
ಬಾಳ ಚಂದ್ರಮನ ಕಾಣುವ ಬಯಕೆ
ಚಿಟಪಟ ಗುಡುವ ಮಳೆಹನಿಯಲ್ಲಿ
ಕುಣಿದಾಡುವ ಬಯಕೆ
ಜೀವದ ಗೆಳೆಯರ ಜೊತೆಯಲಿ ಸೇರಿ
ಜಿಗಿದಾಡುವ ಬಯಕೆ
ತಿಂಗಳ ರಾತ್ರಿಯ ತಂಗಾಳಿಯಲಿ
ತೇಲಾಡುವ ಬಯಕೆ
ಅಮ್ಮನ ಮಡಿಲಲಿ ಅರಗಿಣಿಯಂತೆ
ಬೆಚ್ಚನೆ ಮಲಗುವ ಬಯಕೆ
ಕ್ಷಣ ಕ್ಷಣವೂ ಈ ಬದುಕಿನ ಸವಿಯನು
ಅನುಭವಿಸುವ ಬಯಕೆ
ಬಯಕೆಯ ಮೂಟೆಯ ಹೊತ್ತು ಸಾಗುತಿಹ
ಈ ಬಾಳಿನ ಬಂಡಿಯ
ಚಾಲಕಿಯಾಗಿ ನಗುತ ನಗುತ
ಗುರಿ ಮುಟ್ಟಿಸುವ ಬಯಕೆ